काठमाडौं - बलेफी हाइड्रोपावर लिमिटेडको प्रारम्भिक सार्वजनिक निष्काशन (आईपीओ) मा फागनु २५ गते बुधबार बेलुका साँझ ६ बजेसम्ममा २५ करोड २३ लाख ५३ हजार १०० रुपैयाँ बराबरको सेयर खरीदका लागि माग आवेदन परेको छ ।

बुधबार बेलुकासम्ममा २५ लाख २३ हजार ५३१ कित्ता सेयर खरीदका लागि आवेदन परेको हो । जुन स्थानीय बासिन्दाका लागि जारी सेयरको १३८.०५ प्रतिशत हो ।

कम्पनीले सिन्धुपाल्चोकका आयोजना प्रभावित स्थानीय बासिन्दाका लागि गत माघ २७ गतेदेखि १८ लाख २७ हजार ९७० कित्ता आईपीओ जारी गरेको हो । ग्लोबल आईएमई क्यापिटल लिमिटेडका अनुसार बुधबार साँझसम्म ११ हजार ४२१ वटा आवेदन मार्फत २५ लाख २३ हजार ५३१ कित्ता सेयर सेयरको आवेदन परेको हो । 

जसमध्ये आयोजनाबाट अति प्रभावित ४ हजार ४१२ बासिन्दाबाट सि आश्वा तथा भौतिक दुबै मार्फत कुल १२ लाख ६० हजार ९९० कित्ता र आयोजना निर्माणाधीन जिल्लाका अन्य गाविसका बासिन्दाहरुबाट ७ हजार ९ जिल्लाबासीहरुबाट १२ लाख ६२ हजार ५४१ कित्ता सेयर खरीदको माग परेको हो ।

कम्पनीले जारी पूँजी १ अर्ब ८२ करोड ७९ लाख ७० हजार रुपैयाँको १० प्रतिशतले हुन आउने १८ करोड २७ लाख ९७ हजार रुपैयाँ बराबरको १८ लाख २७ हजार ९७० कित्ता आईपीओ आयोजना प्रभावितका लागि निष्कासन गरेको हो ।

कुल निष्कासित कित्तामध्ये वातावरण मूल्याङ्कन प्रतिवेदन बमोजिम सिन्धुपाल्चोको आयोजना प्रभावित क्षेत्रहरु क्रमशः जुगल गाउँपालिकाका वडा नम्बर २, ३ र ४ का लागि ६० प्रतिशत अर्थात १० लाख ९६ हजार ७८२ कित्ता र आयोजनाको १३२ केभी प्रसारण लाइनबाट प्रभावित क्षेत्रहरु क्रमशः जुगल गाउँपालिकाका वडा नम्बर ५ र ७, बलेफी गाउँपालिका १, ३, ६ र ७ तथा सुनकोशी गाउँपालिकाका वडा नम्बर ७ का बासिन्दाका लागि ४० प्रतिशत अर्थात ७ लाख ३१ हजार १८८ कित्ता छुट्याइएको छ ।

आयोजना प्रभावित क्षेत्रका बासिन्दाले यो आईपीओमा न्यूनतम १० कित्तादेखि अधिकतम १ लाख कित्तासम्म आवेदन दिनसक्ने व्यवस्था छ । स्थानीय बासिन्दाले आईपीओमा सिन्धुपाल्चोकस्थित कुमारी बैंक (जलविरे शाखा), एनसीसी बैंक (ढाँडे शाखा), ग्लोबल आईएमई बैंक (चौतारा शाखा), लक्ष्मी बैंक (चौतारा शाखा) र लक्ष्मी बैंक (खाँडीचौर शाखा) बाट आवेदन दिन सकिनेछ । आईपीओमा फागुन २७ गते बैंकिङ समयसम्म आवेदन दिन सकिनेछ ।