काठमाडौं- यही फागुन १३ गतेबाट प्रदर्शनमा आउन लागेको फिल्म ‘म यस्तो गीत गाउँछु २’ को टिमले प्रचारमा नयाँ शैली अपनाएको छ । 

निर्देशकहरुले फिल्मको गीत, ट्रेलर वा टिजरलाई मात्र प्रचारको अस्त्र बनाइरहेको अवस्थामा निर्देशक सुदर्शन थापाले भने थारु र नेपाल भाषामा प्रमोशनल गीत बनाएर प्रचारमा नयाँ ट्रेन्डको सुरुवात गरेका छन् । 
 
बुधवार थारु भाषाको प्रमोशनल गीत सार्वजनिक गरेपछि निर्माण टिमले बिहीवार नेपाल (नेवारी) भाषाको प्रमोशनल गीत रिलिज गरेको छ । आश्रय रञ्जित र कल्पना श्रेष्ठको स्वर रहेको गीतमा नरेश योगीको शब्द रचना तथा संगीत छ । प्रमोशनल गीतको भिडियोमा नेपाल भाषाका कलाकारहरुसँगै फिल्मका लिड नायक पल शाह र नायिका पूजा शर्मा नेवारी पहिरनमा प्रस्तुत छन् ।
 
यो फिल्ममा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, गणेश गिरी, सोनिका रोकाय लगायतका कलाकारहरुको पनि अभिनय रहेको छ । बनिश शाह र मिलन श्रेष्ठको सम्पादन, सौरभ लामाको छायांकन, रामजी लामिछानेको कोरियोग्राफी र शैलेन्द्र प्रधानको ब्याकग्राउन्ड स्कोर रहेको फिल्मलाई पूजा शर्मा र सुदर्शन थापाले मिलेर निर्माण गरेका हुन् ।