काठमाडौं-जावा मोटरसाइकलको नेपालका लागि आधिकारिक बितरक अग्नी मोटो इंकले जावा र जावा फोर्टी टुको बिएस ६ भर्सन भित्राएको छ । 

नेपाली बजारमा जावा, जावा फोर्टी टु र पेराक गरी कुल तीन वटा मोडल उपलब्ध रहँदै आएकोमा पेराक भने यसअघि नै बिएस ६ भर्सनमा उपलब्ध रहँदै आएको थियो ।

थप दुई वटा मोडलका यी बाइकलाई बिएस६ भर्सनमा उतारेसंगै कम्पनीले यी बाइकको मूल्यमा समेत भारी रकमले बृद्धि गरेको छ । बिएस ४ जावाको सिंगल एबिएसलाई यसअघि ६ लाख ४८ हजार ५ सय र डुअल एबिएसलाई ६ लाख ७६ हजार ५ सय रुपैयाँमा बिक्री गर्दै आइरहेकोमो बिएस ६ को मूल्य क्रमश ७ लाख ५ हजार र ७ लाख ३६ हजार रुपैयाँ पुर्याइएको छ । यो बाइक ५६ हजार ५ सय र ५९ हजार ५ सय रुपैयाँका दरले थप महंगो भएको छ ।

त्यसैगरी अर्को जावा फोर्टी टुको बिएस ६ मा समेत सिंगल एबिएस ५३ हजार र डुअल एबिएस ५६ हजार रुपैयाँका दरले महंगो भएकोे छ । यी बाइकको नयाँ मूल्य क्रमश ६ लाख ७३ हजार र ७ लाख ४ हजार रुपैयाँ निर्धारण गरिएको छ । जवकी यो बाइकको बिएस ४ लाई यसअघि क्रमश ६ लाख २० हजार र ६ लाख ४८ हजार रुपैयाँमा बिक्री गरिँदै आइएको थियो ।

अग्नी मोटो इंकले जावा पेराकमा सबैभन्दा बढी रकम बृद्धि गरेको छ । यसअघि ७ लाख ५० हजार रुपैयाँमा बिक्री हुँदै आएको यो बाइकको मूल्य ७० हजार रुपैयाँले बढेर अहिले ८ लाख २० हजार रुपैयाँ पुगेको छ । पेराक पहिल्यै देखी बिएस६ मा उपलब्ध रहँदै आएको थियो ।