काठमाडौं - विश्वका धनाढ्य व्यक्तिहरुको सूचीमा रहँदै आएका एलन मक्सले आफ्नो कर दायित्व चुक्ता गर्नका लागि टेस्लाको थप ९ लाख ३४ हजार ९१ सेयर बिक्री गरेका छन् ।

उनले ट्वीटर मार्फत नोभेम्बर महिनाको सुरुमा नै टेसलाको १० प्रतिशत स्टक बेच्ने घोषणा गरेका थिए । आफ्नो भनाइलाई सार्थकता दिँदै नोभेम्बरको अन्त्यसम्म आइपुग्दा उनले १०.९० बिलिनय डलर बराबरको १०.१० मिलियन कित्ता सेयर बेचिसकेका छन् ।

यति धेरै सेयर बेच्नुको उदेश्य भने उनको नाममा रहेको १५ बिलियन डलर कर दायित्व चुक्ता गर्नु रहेको छ । मक्सले आफ्नो तलब वा बोनस नगदमा लिने गरेका छैनन् । उनको सम्पत्ति भनेकै स्टक पुरस्कार र टेस्लाको शेयर हो । यसै कारणले पनि उनले कम्पनीको सेयर बेचिरहेका हुन् ।

टेस्लाका प्रमुख कार्यकारी मक्सले ९ लाख बढी कित्ता शेयर बिक्री गरेपछि टेस्लाको स्टक प्राइसमा समेत भारी गिरावट आएको छ । यस हप्ता मात्रै टेस्लाको सेयरमूल्यमा १५.४० प्रतिशत गिरावट आएको छ । यसले कम्पनीका लागि २० महिना यता कै सबैभन्दा खराब असर गरेको छ ।

प्रतिशेयर १०८५ अमेरिकी डलर मूल्य रहेको टेस्लाको कुल बजार पूँजीकरण १.०८९ ट्रिलियन अमेरिकी डलर रहेको छ । सन् २०१० मा कम्पनीको कुल बजार पूँजीकराण् २.५२ बिलियन अमेरिकी डलर रहेको थियो । 

हाल कम्पनीमा ७० हजारभन्दा बढी कर्मचारी कार्यरत छन् । कम्पनीको वार्षिक आम्दानी ३१.३४ बिलयन अमेरिकी डलर रहेको छ । बजार पूँजीकरणका आधारमा हेर्दा हाल टेस्ला विश्वको छैठौं सबैभन्दा मूल्यवान कम्पनीको रुपमा स्थापित भएको छ ।