काठमाडौं, न्यादी हाइड्रोपावर कम्पनी लिमिटेडले भदौ १ गतेदेखि संस्थापक शेयरधनीहरु तथा आयोजना प्रभावित क्षेत्रका स्थानिय बासिन्दाहरुका लागि बिक्री खुल्ला गरेको आईपीओमा चार दिनमै साढे आठ लाख भन्दाबढी कित्ताको लागि आवेदन परेको छ । प्रभावित क्षेत्र र जिल्लाबासीका लागि कुल १५ लाख कित्ता शेयर निष्काशन गरेकोमा शुक्रबारसम्म आठ लाख ५८ हजार ८० कित्ताका लागि आवेदन परेको हो ।

आयोजनाका अनुसार पाँच लाख कित्ता छुट्याइएको प्रभावित क्षेत्रबाट मात्रै दुई लाख ३७ हजार आठ सय ६० कित्ताको लागि अवेदन परेको छ । सोबाहेक १० लाख कित्ता छुट्याइएको जिल्लाबासीका तर्फबाट ६ लाख दुई हजार दुई सय २० कित्ताका लागि आवेदन परेको छ । प्रभावित र जिल्लाबासीका तर्फबाट शेयर खरिदका लागि कुल आठ करोड ५८ लाख आठ हजार रुपैयाँ जम्मा भइसकेको छ ।

कम्पनीले प्रतिशेयर १०० अंकित मूल्यका कुल १८ लाख कित्ता साधारण सेयर निष्कासन गरेको हो । कम्पनीले आयेजनाको वातावरणीय प्रभाव मूल्याङ्कन प्रतिवेदन तथा पुरक वातावरणीय प्रभाव मूल्याङ्कन प्रतिवेदन बमोजिमको अति प्रभावित क्षेत्र लमजुङ जिल्लाको मर्स्याङ्दी गाउँपालिका वडा नं.३ (साविक खुदी गा.वि.स.का वडा नं. १, २, ३ र ६ मात्र) तथा मर्स्याङ्दी गाउँपालिका वडा नं. ६, ७ र ८ (साविक बाहुनडाँडा गा.वि.स. र साविक भुलभुले गा.वि.स. का सम्पूर्ण वडाहरु० का स्थानिय बासिन्दाहरुका लागि ५ लाख कित्ता र सो क्षेत्र बाहेक लमजुङ जिल्लाका अन्य क्षेत्रका स्थानिय बासिन्दाहरुका लागि १० लाख कित्ता सेयर निष्कासन गरेको हो । बाँकी ३ लाख कित्ता भने कम्पनीले आफ्ना संस्थापक शेयरधनी बुटवल पावर कम्पनी र लमजुङ विद्युत विकास कम्पनीका कर्मचारीहरुका लागि निष्कासन गरेको हो ।

लगानीकर्ताले न्यूनतम १० कित्ता र अधिकतम अधिकतममा ५० हजार कित्ताका लागि आवेदन दिन सक्नेछन् ।

आईपीओमा छिटोमा भदौ १५ गते सम्ममा र ढिलोमा भदौ ३० गतेसम्मा आवेदन दिनुपर्नेछ ।