काठमाडौं- सिंगटी हाइड्रो इनर्जीको आइपीओमा करिब साढे ५ गुणा बढी आवेदन आएको छ ।  कम्पनीले सर्वसाधारको लागि बिक्री खुला गरिएको कुल २६ लाख ४० हजार कित्तालाई आधार मान्दा ५.२३ गुणा बढी आवेदन हो । 

बिक्री प्रबन्धक मेगा क्यापिटलका अनुसार आइतबार साँझ ५ बजेसम्म ८ लाख ७९ हजार ७१० जनाले १ करोड ३८ लाख ११ हजार ६४० कित्ताका लागि आवेदन दिएका छन् । कम्पनीको आइपीओमा १ अर्ब ३८ करोड ११ लाख ६४ हजार रुपैयाँ बराबरको आवेदन परेको छ । 

कम्पनीले शुक्रबार (चैत ६ गते) बाट १०० रुपैयाँ दरको कुल २९ लाख कित्ता आइपीओ निष्कासन गरेको हो । यसमध्ये ५८ हजार कर्मचारी र १ लाख ४५ हजार कित्ता म्युचुअल फन्डहरुलाई छुट्याइएको छ । बाँकी २६ लाख ४० हजार कित्ताका लागि सर्वसाधारणले आवेदन दिन सक्नेछन् । 
 
सिंगटी हाइड्रोको आइपीओमा न्यूनतम १० कित्तादेखि अधिकतम २ लाख कित्ताका लागि आवेदन दिन सकिनेछ । यसमा बिक्री प्रबन्धकको काम मेगा क्यापिटलले गरेको छ । यसमा चैत १० गतेसम्म आवेदन दिन सकिनेछ ।