काठमाडौं - यस साता नेपाल स्टक एक्सचेञ्ज (नेप्से) मा २ वटा नयाँ कम्पनी थपिएको छ । ग्रीन लाइफ हाइड्रोपावर कम्पनी लिमिटेड र महिला लघुवित्त वित्तीय संस्था लिमिटेड यस साता नेप्सेमा थपिएका हुन् ।  

उक्त २ कम्पनीसहित यस साता नेप्सेमा ९ वटा कम्पनीको सेयर सूचिकृत भएको छ । हिमालयन बैंक, ग्रीन लाइफ हाइड्रोपावर, महिला लघुवित्त वित्तीय संस्था लिमिटेड, ग्लोबल आइएमई बैंक लिमिटेड, लुम्बिनी विकास बैंक लिमिटेड, नेपाल सेवा लघुवित्त वित्तीय संस्था लिमिटेड, महिला सहयात्रा लघुवित्त वित्तीय संस्था लिमिटेड​, नेपाल बंगलादेश बैंक लिमिटेड र सेन्चुरी कमर्सियल बैंक लिमिटेडको सेयर मूल्य सूचिकृत भएको हो । 

जसमा हिमालयन बैंकको १४ प्रतिशत बोनस बापतको एक करोड ३१ लाख २१ हजार एक सय ९४ कित्ता सेयर सूचिकृत भएको छ । त्यस्तै ग्रीन लाइफ हाइड्रोपावर कम्पनी लिमिटेडको एक करोड ८० लाख कित्ता आईपीओ, महिला लघुवित्त वित्तीय संस्था लिमिटेडको १० लाख कित्ता आईपीओ नेप्सेमा सूचिकृत भएको हो । 

साथै ग्लोबल आइएमई बैंक लिमिटेडको १४ प्रतिशत बोनस बापतको २ करोड ६५ लाख ६६ हजार २ सय ३१ दशमलव ८ कित्ता सेयर, लुम्बिनी विकास बैंक लिमिटेडको ७ प्रतिशत बोनस बापतको १९ लाख एक हजार ४ सय १८ दशमलव २१  कित्ता सेयर सूचिकृत भएको छ । 

नेपाल सेवा लघुवित्त वित्तीय संस्था लिमिटेडको २.५ प्रतिशत बोनस बराबरको १५ हजार कित्ता सेयर, महिला सहयात्रा लघुवित्त वित्तीय संस्था लिमिटेड​को १ लाख २१ हजार कित्ता बोनस सेयर, नेपाल बंगलादेश बैंक लिमिटेडको ५० लाख ६९ हजार ५८२ कित्ता बोनस सेयर र २२ हजार ८२९ कित्ता हकप्रद सेयर र सेन्चुरी कमर्सियल बैंक लिमिटेडको ६१ लाख ८९ हजार ५७९ दशमलव २६ कित्ता बोनस सेयर सूचिकृत भएको नेप्सेले जनाएको छ ।