कोरोना भाइरसको महामारीसँग जुध्नु परिरहेको बेला सत्तारुढ दल नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले चीनलाई सम्झिएका छन् । 

प्रचण्डले चिनियाँ राष्टपति सी जिनफिगलाई पत्र पठाउदै नेपाल कोरोना महामारीको चपेटमा पर्न थालेको भन्दै त्यसका लागि तत्काल मेडिकल सामाग्री सहयोग मागेका छन् । 

महामारीसँग जुध्न नेपालले पूर्ण तयारी गरिनसकेको भन्दै प्रचण्डले अत्यावश्यक मेडिकल इक्युपमेन्टलगायत अन्य सामग्रीको सहयोग गर्न सीसँग अनुरोध गरेका छन् ।  

गत मार्च २६ मा पठाएको पत्रमा अध्यक्ष ‘प्रचण्ड’ले राष्टपति सी लाई कोरोना नियन्त्रणमा सफल भएकोमा बधाई पनि दिएका छन् । 

‘चीनले कोरोना संक्रमणलाई सफलतापूर्वक नियन्त्रण गरेको मिडियाहरुका समाचारबाट थाहा पाएको छु । यो लडाइँमा जित हात पारेकोमा म नेकपाका तर्फबाट बधाइ दिन्छु’ अध्यक्ष प्रचण्डले पत्रमा भनेका छन् ।  

गत डिसेम्बरदेखि फैलिएको कोरोना भाइरसको संक्रमण चिनले लगभग नियन्त्रण गरिसकेको छ । संक्रमणका कारण चीनमा ८१ हजार ४ सय ३९ जना मानिस संक्रमित भएका थिए । त्यसमध्ये तीन हजार तीन सयको मृत्यु भएपनि अरुलाई चीनले उपचार गरेर बनाउन सफल भएको छ । 

चीनको वुहान सहरबाट सुरु भएको मानिएको कोरोना भाइरसलाई विश्व स्वास्थ्य संगठनले कोभिड-१९ नाम दिएको छ । 

अहिले कोरोना भाइरसको संक्रमण विश्वभर यो फैलिँदा ३२ हजार  मानिसको ज्यान गइसकेको छ ।

आइतबार मात्रै नेपालका लागि चिनियाँ राजदूत होउ यान्छीले नेपाललाई   २४ हजार थान मास्क, दुई हजार थान एन नाइन्टी फाइभ मास्क, पाँच सय थान चस्मा , सय थान थर्मोमिटर , ३० थान व्यक्तिगत सुरक्षा सामग्री , एक थान भेन्टिलेटर र चार सय बक्सा क्वारेन्टाइन टेबल हस्तान्तरण गरेकी थिइन् ।