त्रिभुवन अन्तर्राष्ट्रिय विमानस्थलको धावनमार्ग लगायत जीणोद्वारको दोस्रो चरणको काम सकिएको छ । यो सँगै अब अन्तर्राष्ट्रिय विमानस्थल दैनिक २१ घण्टा सञ्चालनमा आउने भएको छ । गत भदौ १५ देखि पुस १५ सम्मका लागि भनेर दैनिक ७ घण्टा विमानस्थल बन्द गरी मर्मत कार्य सुरु गरिएको भए पनि निर्धारित समयअघि नै जीर्णोद्वार काम पूरा भएको विमानस्थलले जनाएको छ ।

विमानस्थलका महाप्रबन्धक देवेन्द्र केसीले अन्तर्राष्ट्रिय विमानस्थलको धावनमार्ग र ट्याक्सी वे मर्मतको काम सम्पन्न भएको जानकारी दिए । आगामी ३१ डिसेम्बर अर्थात पुस १५ गतेदेखि विमानस्थल दैनिक २१ घण्टा सञ्चालनमा आउने उनको भनाई छ ।

विमानस्थल २१ घण्टा सञ्चालनका लागि हामी त आजै तयार छौं तर उडान भर्ने वायुसेवा प्रदायक कम्पनीलाई हामी सञ्चालनयोग्य भयौँ भनेर पत्राचार गर्नुपर्यो, त्यसैले ३१ डिसेम्बरसम्म उडानका लागि तयारी गर्न एयरलाइन्सहरुसँग छलफल गरी आग्रह गरिसकेका छौँ, महाप्रबन्धक केसीले भने । 
 
उनले नेपाल भ्रमण वर्षलाई लक्षित गर्दै जीर्णोद्वार काम सकेर विमानस्थललाई तयारीयोग्य बनाइएको बताए । सरकारले त्रिभुवन अन्तर्राष्ट्रिय विमानस्थललाई २४सै घण्टा सञ्चालन गर्ने भन्दै बजेट तथा नीति कार्यक्रममै घोषणा गरेको थियो । जीणोद्वार काम सकेपछि विमानस्थलको क्षमता बढ्ने र हालको चाप न्यूनीकरण हुने अपेक्षा गरिएको छ ।

सन् २०२० को मार्च महिनादेखि सञ्चालनमा ल्याउने गरी तीव्र गतिमा निर्माण भइरहेको भैरहवास्थित गौतमबुद्ध अन्तर्राष्ट्रिय विमानस्थल सञ्चालनमा आएपछि काठमाडौँ विमानस्थलको चाप व्यवस्थापनमा थप सहज हुने सम्बद्ध अधिकारीले बताउँदै आएका छन् । यो आयोजनाको हाल ९० प्रतिशत भौतिक प्रगति छ । पोखरा क्षेत्रीय अन्तर्राष्ट्रिय विमानस्थलको काम पनि द्रुतगतिमा भइरहेको छ । हाल उक्त विमानस्थलको भौतिक प्रगति ५० प्रतिशत भन्दामाथि रहेको आयोजनाले जनाएको छ ।

विमानस्थलले मर्मतको काम निर्धारित समय अगावै सम्पन्न गरेर सफल उदाहरण प्रस्तुत गरेको महाप्रबन्धक केसीले बताए । यस अवधिमा विमानस्थलको ३ हजार मिटर लामो धावनमार्ग कालोपत्र, ट्याक्सी वे कालोपत्र गर्ने र बत्ती जडानको काम सकिएको छ । दोस्रो चरणमा रनवे सेन्टरलाइन लाइट फेर्ने तथा ट्याक्सी वे र रनवे जोड्ने लिंक रोड निर्माण लगायतको काम पनि पूरा भएको छ ।  
 
अबको १३ दिनपछि सुरु हुने नेपाल भ्रमण वर्षका लागि अन्तर्राष्ट्रिय विमानस्थलको प्रगतिलाई एक सुःखद क्षणका रुपमा लिन सकिन्छ । कतिपय ठूला आयोजना निर्माणमा विलम्ब भइरहेका बेला विमानस्थलको जीर्णोद्वार निर्धारित समयअघि नै सकिनुले अन्य आयोजनालाई पनि घचघच्याउन उदाहरणीय साबित भएको छ । यसअघि मर्मतको अवधिमा विमानस्थल बेलुका साढे ११ बजेदेखि बिहान साढे ६ बजेसम्म विमानस्थल बन्द हुन्थ्यो ।

विमानस्थलको पहिलो चरणअन्तर्गत २०७५ चैत १८ देखि २०७६ असार १५ गतेसम्म विमानस्थल धावनमार्ग मर्मतको काम गरिएको थियो । विमानस्थलको धावनमार्ग ३ हजार ५० मिटर लम्बाइ र ४६ मिटर चौडाइको छ । उक्त अवधिमा राति १० बजेदेखि बिहान ८ बजेसम्म दैनिक १० घण्टा विमानस्थल बन्द गरी मर्मतको काम गरिएको थियो । विमानस्थल विकास शुल्कबापत यात्रुबाट लिइँदै आएको १ हजार रुपैयाँ संकलनबाट विमानस्थल मर्मतको काम गरिएको हो ।

४ अर्ब ७८ करोड लागतमा धावनमार्ग मर्मतसम्भारको जिम्मा चीनको सरकारी कम्पनी चाइना नेसनल एरो टेक्नोलोजी इन्टरनेसनल इञ्जिनियरिङले पाएको थियो । अन्तर्राष्ट्रिय विमानस्थल निर्माण इतिहासमा पहिलोपटक धावनमार्ग पुनः सुधार गरिएको नियामक निकाय नेपाल नागरिक उड्यान प्राधिकरणले जनाएको छ । प्राधिकरणअन्तर्गतको हवाई यातायात क्षमता अभिवृद्धि आयोजनाले धावनमार्ग स्तरोन्नतिको काम गरेको हो । 
 
लामो समयदेखि धावनमार्गको कालोपत्र उप्किदा पटक–पटक समस्या परेपछि सरकारले धावनमार्ग पूर्णरूपमा मर्मत ‘रनवे रिह्याब’ गर्ने योजना बनाएको थियो । देशकै ऐनाका रूपमा रहेको संवेदनशील मानिने अन्तर्राष्ट्रिय विमानस्थलको जीर्णोद्वार गरी भरपर्दो र विश्वसनीय सेवा उपलब्ध गराउने उद्देश्यले विमानस्थल मर्मतको काम उच्च प्राथमिकतामा परेको प्राधिकरणको भनाई छ ।  
 
सन् १९८० मा निर्माण भएको धावनमार्ग अहिलेसम्म विस्तार तथा मर्मत हुन सकेको थिएन । सन् २०१४ बाटै विमानस्थलको धावनमार्ग बिग्रिन सुरु भएको थियो । त्यसपछि २४ सै घण्टा द्रुत उद्धारटोली बनाएर सतर्क अवस्थामा राखिएको थियो ।