गुल्मी जिल्ला अदालतले कार्यालय सहयोगी विश्वम्भर यादवलाई विनाकारण जागिरबाट निकालेको छ ।

विरामी भएर उपचार गर्न काठमाडौं गएका यादवलाई उपचार गरेर फर्कँदा जागिरबाट निकालिएको हो । 

कपिलवस्तु घर भएका यादव २०७२ सालदेखि जिल्ला अदालत गुल्मीमा कार्यालय सहयोगी र न्यायधीशको भान्छेको रुपमा कार्यरत थिए ।

करारका जागिरे उनको गत साउनमा मात्र ६ महिनाका लागि करार सम्झौता भएको थियो । 

ज्वरो र रुघाखोकी लागेपछि श्रेस्तेदार कृष्णशरण लामिछानेको अनुमतिमा उपचारका लागि काठमाडौं गएका यादवलाई कार्यालयमा फर्केपछि जागिरमा नआउनू भनिएको थियो ।

यादवका अनुसार उपचार गरेर फर्केपछि जिल्ला न्यायधिश कृष्ण प्रसाद पौडेलले विरामी भएकोले काम गर्न सक्दैनौ कि भनेर सोधेका थिए ।

तर यादवले ठूलो बिरामी होइन काम गर्न सक्छु भनेपछि एकपटक श्रेस्तेदारसँग सल्लाह गर्नू भनेर पठाएका थिए ।

श्रेस्तेदार लामिछानेले 'न्यायधीले नबोलाउनू भन्नुभएको छ' भन्ने कुरा सुनाएपछि आफू घर फर्केको यादवले बताएका छन् । 

जिल्ला न्यायधिश पौडेल भर्खरै सरुवा भएर गुल्मी आएका हुन् ।

आफू नयाँ न्यायधिश आएपछि एकदिन मात्र सँगै रहेको भएपनि के कमजोरीले निकालियो भन्ने कुरा जानकारी नभएको यादवको भनाइ छ । 

एसएलसी उत्तिर्ण यादव मलेसिया बैदेशिक राेजगारीका रूपमा काम गरेर फर्केका व्यक्ति हुन् । 

परिवार पाल्न समस्या भएपछि गुल्मी जिल्ला अदालतमा कार्यालय सहयोगीको रुपमा कार्यरत थिए ।

आफूले निश्चित समयमात्र नभनेर दिनभर कार्यालय सहयोगी र बिहान बेलुका भान्छेको काम गरेपनि के कारणले आफूलाई निकालियो भन्ने कुरा भने थाहा नभएको बताए ।

यसबारे बुझ्न खोज्दा अदालतका सूचना अधिकारी समेत रहेका श्रेस्तेदार लामिछानेले फोन उठाएनन् ।