नेपाल–चीनबीच सीमाक्षेत्रमा हुने अपराध नियन्त्रण गर्नका लागि दुवै देशका सुरक्षा अधिकारीबीचको वार्ता बिनानिष्कर्ष टुङ्गिएको छ । 

ठोस निर्णय नभएको र चीनको माथिल्लो निकाय तथा र नेपाल सरकारबाट लिखितरूपमा निर्णय गर्ने अधिकारी नआएपछि लिखित निर्णय नभएको हुम्लाका प्रमुख जिल्ला अधिकारी विनिता भटराई बताइन् । 
चीनको बुराङ काउण्टीको ताक्लाकोटमा भएको सीमा सुरक्षा वार्ताका लागि भटराईको संयोजकत्वमा टोली गएको थियो ।  

गृह मन्त्रालयले सीमा सुरक्षा वार्तामा कुनै सम्झौतामा हस्ताक्षर नगर्ने र अनौपचारिक कार्यक्रममा सहभागी हुने भनी आदेश दिएकाले वार्तामा चिनियाँ पक्षले ल्याएको एजेण्डामा प्रजिअले हस्ताक्षेर नगरेपछि वार्ता बिनानिष्कर्ष टुङ्गिएको उनले बताइन् । 

वार्ताका लागि चिनियाँ पक्षले सिमानासँग जोडिएका नाकामा तिब्ब्तीहरुको आवतजावतमा कडाइका साथ जाँच गर्ने, अनधिकृत प्रवेशमा रोक लगाउने, चीनविरोधी गतिविधिमा संलग्नलाई निगरानी गर्नेलगायतका विषयमा भने छलफल भएको प्रजिअ भट्टराईको भनाइ छ ।             

चिनियाँ पक्षले तिब्बती नागरिक नेपाल हुँदै बिनाप्रवेशाज्ञा भारत जान रोक लगाउनुपर्ने, सीमामा हुने अनैतिक कार्य बन्द गर्नुपर्ने, मानिस आवतजावत गर्ने नाकामा संयुक्त सुरक्षा पोष्ट बनाई आवतजावतमा कडाइ गर्नुपर्ने, हिल्सा नाकाबाट हुने सुन तस्करी बन्द हुनुपर्ने, अवैधरूपमा हुने हातहतियार तथा मानव तस्करी र विभिन्न खाले सामानको ओसारपोसारमा रोक लगाउनुपर्ने भन्ने एजेण्डा अघि सारेको थियो । 

चीन सरकारका यी एजेण्डामा नेपालको तर्फबाट प्रमुख जिल्ला अधिकारी भट्टराईले हस्ताक्षर नगरेपछि वार्ता बिनानिष्कर्ष टुङ्गिएको हो । विगतका वर्षमा वार्ता टोलीलाई वार्ता सकिएपछि मानसरोवर कैलाश घुमाएर नेपाल पठाउने गरिएको भए पनि यसपटकको वार्ता असफल भएपछि वार्ता टोलीलाई मानसरोवर कैलाश जान नदिएर ताक्लाकोट नै फिर्ता पठाएको छ । 

वार्ता भएपछि केही समस्या समाधान होला भनेर सोचेका हुम्लीवासी सीमा सुरक्षा वार्ता असफल भएपछि निराश भएका छन् । 

सीमा वार्ताको बैठक चिनियाँ सीमा प्रहरीचौकी सेरामा बसेको थियो । चिनियाँ पक्षको पुराङ्ग काउण्टीका सिडिओ किउसीले नेतृत्व गरेका थिए ।