जनकपुर – मङ्गलबार जनकपुरमा पत्रकारहरुसँग कुरा गर्दै मन्त्री बाँस्कोटाले वर्तमान सरकार प्रगति, अग्रगति र सामाजिक न्यायलाई विशेष मुद्दा बनाइसकेको कारण अबको पाँच वर्षसम्म सरकारले विकासलाई मुख्यकेन्द्र बनाएर अघि बढ्ने दाबी गरे ।

उनले संघ, प्रदेश र स्थानीय सरकारले चुनावमा गरेका वाचा पूरा गर्नुपर्ने भन्दै प्रदेशले आफ्नो अधिकार क्षेत्रभित्र बसेर काम गरे हरेक क्षेत्रको विकास तीव्र ढङ्गले हुने बताए ।

संविधान संशोधनका बारेमा मन्त्री बाँस्कोटाले औचित्य पुष्टि भए संविधान संशोधन गर्न सकिने बताए । ‘संविधान कुनै गीता, रामायण वा कुनै धर्म ग्रन्थ नरहेकोले यी कुराहरु पुष्टी भए सरकार जतिबेला पनि संविधान संशोधनका लागि तयार हुन्छ,’ मन्त्री बाँस्कोटाको भनाई छ ।

उनले सरकारलाई जबसम्म संविधान संशोधन गर्नुपर्ने आवश्यकता लाग्दैन, तबसम्म संविधान संशोधन नहुने स्पष्ट पारे ।

उनले बजेटको समयमै सदूपयोग गर्ने वाध्यात्मक व्यवस्था रहेकोले यस वर्षबाट विकास निर्माणका कार्यहरुले गति लिने विश्वास व्यक्त गरे ।

नेपाल सरकारका सबै मन्त्रीहरुले कार्य सम्पादनका लागि सम्झौता गरेकोले ती मन्त्रीहरुले गर्ने कार्यको मूल्याङ्कन नेपाली जनताले गर्ने उनको भनाई थियो । उनले संघ सरकारले प्रदेश नम्बर दुईको विकासका लागि सबैभन्दा धेरै परियोजनाहरु सञ्चालनमा ल्याएको बताए ।

उनले प्रदेश नम्बर दुईमा नेपाल रेल्वे, निजगढ अन्तर्राष्ट्रिय विमानस्थल, कमला मरिन डाइभर्सन, मदन भण्डारी राजमार्ग, कोशी करिडोर, नारायणी करिडोर लगायतका परियोजनाहरु सञ्चालनमा ल्याएको जानकारी दिए ।

फरक प्रसङ्गमा मन्त्री बाँस्कोटाले सञ्चारकर्मीलाई पूर्वाग्रही भएर कलम नचलाउन आग्रह गरे । ‘राम्रोलाई राम्रो र नराम्रोलाई नराम्रो भन्नुस् । तर, तथ्यपरक हिसाबले मात्रै समाचार सम्प्रेषण गर्नुस्,’ उनको भनाई थियो ।