काठमाडौँ – पछिल्लो समय बजारमा नेप्से परिसूचकसँगै कारोबार रकममा पनि उल्लेख्य सुधार देखिएको छ । आइतबार मात्रै कुल १७६ कम्पनीको साढे एक अर्ब रुपैयाँ बढीको सेयर किनबेच भएको छ । आज आइतबार ४९ लाख २१ लाख कित्ता सेयर एक अर्ब ६७ करोड रुपैयाँमा किनबेच भएको छ ।

पछिल्ला दुई साताजस्तै यस साता पनि वाणिज्य बैंकहरुको बढी सेयर कारोबार भएको छ । आइतबार सबैभन्दा बढी नेपाल बैंकको सेयर किनबेच भएको छ । बैंकको एकैदिन २३ करोड रुपैयाँ बराबरको सेयर कारोबार भएको छ । जसको सेयर मूल्य प्रतिकित्ता ३२५ रुपैयाँ रहेको छ ।  बजारमा अधिकांश वाणिज्य बैंकहरुको बढी कारोबार भएता पनि सेयर मूल्यमा भने गिरावट देखिएको छ ।

त्यस्तै, सेयर बजारमा पालैपालो परिसूचकहरुमा वृद्धि आएको छ । यस साताअघि वाणिज्य बैंकको समूहमा सूधार देखिएको थियो भने आइतबार बीमा समूहको सूचकमा उच्च वृद्धि भएको छ । बजार बन्द हुँदा जीवन बीमा ६२९ र निर्जीवन बीमा समूह ४६२ अंकले बढेको छ ।